Nachkriegsweihnacht (österr. Mundart)

[Steirergerhard]

Glei noch'm Kriag, im 46er Joahr
hot's nix zan Essn gebn,
und des is woahr!
Do woar des schu ollahaund,
wenns mit an Bauan woarst vawaundt.
Net zum verochtn woar do a
a Onkl in Amerika!

Am Heilig'n Obnd,
i schrei: "HURRAAA -
a Packal aus Amerika!"
vun uns'ra liabn Tante Rousn -
g'füllt mit houffnungsvolln Dousn.
I reiß glei auf und reck mein Hols,
oubn drauf is glei a Kilo Schmolz.
A Kilo Bohnenkafee ... SCHAU -
a grouße Dousn mit Kaukau!
und nebn drau, oh guate Söl,
a Bichsn mit Olivn-Öl.
A grouße Dosn Reis,
zwoa Kilo Mehl, wia Schnee sou weiß.

Und olles schrieb die Tante Rousn
hechst eigenhändig auf die Dousn.

Blouß vun da Weißblechdousn unt'n
do woar da Zettl holt vaschwundn!
Wos kunnt in dera Dousn sei ?
I hobs probiert, a poarmol glei.
Es woar net sauer und net siaß,
gschmeckt hots wie eingschlofne Fiaß.
Sou homma uns den Kopf zabrouchn,
wos kunnt ma aus dem Pulva kouchn?

Die Mama mant: "Des kunnt a Schmankal sei,
do kouch ma uns an guatn Brei!"
Sou haut sie glei mit Mülch und Ei
des Pulva in a Pfandl nei.
An guatn Rot gibt nou die Oma:
"Gib dazua a bißl Zimtaroma,
rührs z'saumm no mit an Löffl Schmolz -
und tua dazua a Prisn Solz!"
Und mit ana Einbrenn und an Zwiebl,
hot's wirkli gschmeckt - woar goar net übl.

Jo, liabe Leit, schu drei Tog drauf
klärt mit an Briaf sich olles auf.
Und schuld draun - es is a schwocha Troust,
woarn blouß die Schlaumpatn vun da Poust!
Die Tante Rousn, die hot gschriebn:
"I schick eich a Packerl heit noch drübn -
mit lauta scheene guate Sochn,
und hoff, dass dei a Freid eich mochn.

Nur - wos ihr leida nouch net wisst,
dass Ounkl Schursch hiaz gsturbn ist.
Er woar troutz seina 90 Joahr -
a echta Steira, wirkli woahr!

I will sein letztn Wunsch eich kündn:
Dahoam wüll er sei Ruahstott findn.
Und so sei es, wie es sei:
Setzt's eahm in olla Stülle bei!
Sei Oschn is in da Weißblechdousn,
in stiller Trauer - Tante Rousn

Und so homma, mia wern's nia vagessn,
z'Weihnocht 46 unsan Ounkl gfressn !!!

[Konni]

Zitat von Steirergerhard

............... I will sein letztn Wunsch eich kündn:
Dahoam wüll er sei Ruahstott findn.
Und so sei es, wie es sei:
Setzt's eahm in olla Stülle bei!
Sei Oschn is in da Weißblechdousn,
in stiller Trauer - Tante Rousn

Und so homma, mia wern's nia vagessn,
z'Weihnocht 46 unsan Ounkl gfressn !!!

"Na dann - Mahlzeit"